G20 tonnak a kaimi a tamdeuh nih ralkap thazang in Syria zuanhnawh lo ding an ka dirpi, tiah Russia ramhun Putin nih a chim. USA ramhun Obama zong nih mah ticun a chim ve. Asinain Syria an kah ahcun Russia nih bawmh ding ah redi a si, tiah fiang tein Putin nih G20 tonnak i thawngfianternak an tuah lio ah a chim.
Russia le Syria cu caan saupi hawikom ttha an si bantuk in le Syria ah Russia miphun tamtuk an um. Cucaah kan hnu zarh i USA nih raltuknak tinbaw le vanlawng Syria kam a thawn lio khan Russia zong nih raltuknak tinbaw cu Syria kam ah a chiah ve tiah BBC nih a rak chim colh. Asinain atu cu Obama he suimilam cheu chung pumpak bia an i ruah hnu ah Syria an kah paoh ahcun kan bawmh lai, a ti i a thaizing ah Russia ralkap le tinbaw zong Syria ah an kuat chap colh.
Syria ram chung buainak cu kum 3 chung a hung lut cang i nunnak tam tuk a liam, khua tamtuk a rawk. Assad cozah nih nawlngeihnak kaltak an duh lo. Ahnubik august thla ah Gas/chemistry khuvai chia an hman caah minung 250 leng an thi i cucu vawleipi nih an duh lomi UN zong nih a khammi a si. Cu tikah USA, UK, France le Denmark nih international phung a buar tiah Assad cu UN Security Council nih a kham zong ah kan kah ko lai, an rak ti.
Assad le a naupa cu USA ramdang vuanci Kerry nih Hitler nakin a sualdeuhmi, amah miphun gas/siivai in a thattu a si, a ti. Asinain Russia nih cun Assad cozah nih an tuahmi a si lo, Assad cozah a dotu tapung nih international pi nih kan tlangtlak hna seh tiah atu bantuk thil ttha lo an hmanmi a si kho deuhmi a si, an ti ve. Cucu UK i parliament ah Cameron nih Syria kah ding a chuahpi tikah Labour party nih Assad nih a tuah bak timi teh-te na kan hmuhsak khawh lo caah ralkap thazang cu kan hmang lai lo, tiin an tei ve.
UN security council ah Russia le Tuluk nih veto hmang in Syria kong cu an kham lengmang caah UN SC hnatlaknak tel lo zong in kan kah lai, tiah Obama nih a chim. Asinain US Congress le Senate ah Assad a sinak a fianh khawh i an hnatlakpi a herh. Cu bantuk in Syria tuk ding a chuahpi tikah Congress le Senate nih ni 90 chung Syria tuknak nawl an pek. Syria kan kahmi hi North-Korea le Iran hrocernak zong ah siseh an ti phah. Asinain USA nih Iraq a rak tuk bantuk kha a si rih sual hnga maw? timi biahalnak cu anmah USA lawngah si lo in vawleicung minung tampi an lunghring.
Atu hi ca ka ttial cuahmah lio ah Obama nih Syria tuknak ding ah rocket le bomb a timhlamh cang i ni tlawmte chung ah a tuk lai tiah LAtime nih a ttial ve.
UN nih a thlahmi hlathlainak tuahtu hna cu kan hnu zarh khan Syria in an chuak i gas ttha lo in minung 250 leng thah an si le si lo an zohmi cu "a si ko" tiah an fehter. Hi bantuk gas/siivai hi acozah lawng nih hman khawhmi a si tiah ruah a si i UN nih an zohfel hnu ah biachahnak cu tu hnu zarh khat chung ah an tuah lai tiah France ramhun Hollande nih a chim. UN security council ah ralkap thazang hman ding an ceih tthan lai, i Russia nih zeitin a ti tthan te hnga? G20 tonnak an tuah hlan ah khan cun Assad nih a rammi cungah Gas a hman ahcun UN nih a luh hnawh awk a si ko, a rak timi kha a leet te hnga maw?
Syria kong lawng ah a si lo, USA le Russia hi Snowden kong ah pakhat le pakhat ertaunak an ngei cang. Snowden cu USA cozah leirawitu an ti i Hong Kong a um lio in tlaih i USA ah kuat ding ti a si nain Russia ah a zaam kho i Russia international airport pakhat ah sau ngai a um. USA nih von ka kua a ti ko nain Russia nih Snowden cu ram chung ah dornak a pek caah Obama nih Russia tlawn a timhmi zong a rak let i an pahnih kar pehtlaihnak a rak dai.
Cuti a si caah atu Syria tuk dingmi zong hi anamh USA le Russia kar nawlngeihnak le thazaang icuh duh ah a si bik kho ko. Russia nih ralpi pahnihnak hnu i Soviet Union in a chuakmi ram pawl kha khomh tthan le fonhter aa timh cuahmah lio a si fawn caah a thazang le international i nawl a ngeihnak kha a langhter hrim a hauh lio zong a si. Cun USA nih 2000 hnu ral an tukmi an ruahning bantuk a si lo caah a thar in an thazang Syria ah langhter an duh zong a si kho fawn. Cun Middle East ah an ral simi Iran hrocer an duh pah zong a si lai i Iran cu Russia he a naihniam a si rih fawn.
Ahnubik ah Syria kong hi Bible cauk chung ah fiang ngai in a chim cangmi a si i Bible tlinnak zong cu a si kho ko. Zei sihmanhah Russia le USA cu an i rem lo ti cu a fiang. Cun Syria kah hi Iraq le Afganistan kah he aa dang hnga lo. Daihnak a chuahpitu raltuknak cu a si fawn lai lo tiah,...
Comments
Post a Comment