Kan Innpa Thar


TV le radio nih mithi kong he pehtlaih in mithat hmang kong an chim lengmang. Thla hnih chung a si cang. Mi panga thah an si. A thattu belte theih a si rih lo. Chaklei um pawl nih cun an celh ti lo, an ttih tuk. A thimi hi nungak no tete an si. TV le thawngzamhnak phunphun nih ralrin a kan pek. Mah cu mithatpa kong cu a mikip nih ceih a si. “Nan theih huaha lomi cu chawn hna hlah uh,” ti a si.

Kan umnak khua cu a rawn. Tthal a si caah hringdildal in pangpar phunkip an par. Khua zohkhenhtu nih lamkam kip ah pangpar an cin hna i zanlei ninem ah ti an tawih tawn hna. Mawttaw chawklet a tlawm, khua lengdeuh a si caah a dai khun. Hmun lawng a tam, inn thar sak cuahmah mi zong an tampi. Kan inncar ah zeitik kar i mi an hung i tthial manh ka thei lo, hi inn an limnak zarh hnih lawng a si rih.

Zanlei sianginn ka hung lawi ah pa pakhat, ka pa tthi hrawng, a bomban ttha, pa leek ngai nih a mawttaw hnulei i thiltom, innchung lei ah a thiar lio khi a hnulei in ka hei hmuh. A sam a liang can in a thlah i a angki tlehnak in a ban aa suaimi tattoo cu a vun kawrpi he a lang. Ka lau tuk i inntang mileng khan ah ka va ttum. Innpi luhnak kam i kan chiahmi tadinca cu ka zoh i mithat pa Cartoon in an suaimi a tattoo bak a si ruang ah ka lau chinchin. Inncung ka va kai tthan i ka zoh cu a rak um ti lo. A mawttaw zong um ti lo. Cu zan 12:00 i ka ih tiang ah a inn mei a ceu lo.

A thaizanlei inn ka ttin bak in inncar lei cu ka khaan thlalangawng in ka zoh i dum chung ah nitlaang a rak i pho i nungak pahnih he beer an rak din lio ka hmuh hna. Zu le sa eimi a si ka hmuh cun ka lau chinchin.

Caw-ngia tang ah aa peh

TV nih atu tiang mithattu kan thei kho rih lo, tiah a chim lengmang rih ko.

Zanlei suimilam panga a si nain ni a sang tuk rih. Kan khua laicer ah tiva lian ngai a luang, i sang hngakchiapawl cu zanlei sang ah an i kholh hna. Lamkam pangpar cu thli nih a hun cheem tawn hna i an i hngir len. Zung kai le rianttuanpawl an ttin ve hna i zanlei ah hin cun aw-aan a von tamdeuh ve. Kan inn cu a saang ngai i ka ihnakkhaan in ka hei cuanh ahcun inn tam ngai cu dum he ka hei hmuh khawh. Zanlei atu tik hrawng ah dum chung ah ca a rel mi, sa a em i zanriah an ei lio hmuh khawh an si hna. Cun aa daimi hngakchia tampi ka hmuh hna. Kan innpa thar nih uico a beer-dur in a hei chehmi nih a ka hlauh. Hi pa hi mi phundang hrimhrim a si. A umtu ning le a hoiher ka zoh tikah ka zum lo thluahmah. Nain, mi an thih lengmang nak cu kan khua ah a si lo, khua chaklei ah a si ruang ah ka zumh lonak kong cu ka chungle le ka hawile zong ka chim rih hna lo.

Thlapa a van ngai lio zan suimilam 11 hrawng ah hramh riamnak motor fate thawng ka theih i thinhun lungte in ka tho. Lenglei ka hei zoh cu taklawng, zei thil hmanh i hruk lo in a dum hramh a tan cuahmah mi kan innpa thar cu ka hmuh. Fifik ai tum pah. A molh cang ko hi teh ka ti, nain thin haan lung in hman tamlak te ka thlak. A dum cu a kauh tuk lo caah a lim colh i a thawng dai. Hi mimolh nih hin mi zei maw that lai tiah ka lung hrinhmi vialte a tlau i ka nih a chuak salam. Cun zanlei ka lawi khawh bak in a inn lei ka bih tawn mi ka bih ti lo.

Ni thum hnu ah kan khua tadinca, radio le TV kip ah mi a thimi kong an chim. Nizan ah nungak note pakhat an thah. Cucaah khuachak lei ah mi thah a um ti lo kan timi hi kan khua ah a hung i tthial a si lai, tiah an chim.

Cu zanlei cu inn ka ttin bak in ka room ah ka tthu i inncar lei cu ka bih tthan. A lawi tlai ngai, suimilam pakua ah voi khat zan i beer a dinpimi samnak nu he an i sik bu in mawttaw chung in an hung chuak. Pa nih cun a ban in a dawh i a luh pi. Inn chung an luh hnu ah nu nih a kut in a sawh chih khi thlalangawng in ka hmuh. An kaa fakpi in an aan i an i raak len, nu cu an sam zong aa tuai dih i a mitthli ai hnawh khi ka hmuh.

Nu nih cun cabuai cung i pangpar dur cu a lak i mipa cu a cheh, nain a nganh i kan innlei thlalangawng tu a kuai. Cu le cangka mipa nih cun nu cu a kuh i a kaa a phih, i cu vial ah innpi cu a mui, mei a mit.

A thah cang ko hi teh tiah um awk ka hngal lo. Nain fiangte in ka hmuh lo caah ka chim ngam lo. Ka thin kai domh i tthep lo in a inn cu ka zoh peng. Sau nawn hnu ah mei cu a von i vang tthan. Nu ka hmu ti lo. Mipa cu a sofa cung ah a tthu, a kut hnih in a sam aa tlaih i a lu khun… tuah awk a thei ti lomi a vansang mi bantuk in,.. a van cau.

A dir.
Inn cung hlei lei ah a kal. Inn cung mei vialte a mih dih hnu ah inntang ah a hung ttum tthan. A khaa ai tthoh, aa chawk. A caan ah a sam ai tlaih. Cun leng ah a chuak i a bukbau/innte lei ah a kal. Mei a van i aa tuai len ko. Zan pahra a tling deng, a mui ngai cang. Ka room mei ka hmih caah, ka bihmi hi a thei kho lai lo.

Inn chung a luh pah ah, ka bihnak thlalangawng khar ka suk sual i a thawng a theih. Kan innlei cu sau ngai a zoh hnu ah innchung ah a lut. Ka bih ning te cun ka bih ko rih. Inn chung a luh hnu ah thlalangawngzar a zar dih hna. Inn chung i aa tuai len lio cu a fiang in ka hmu kho ti lo. Ka lung hring, um zia ka thiam lo. A caancaan ah mei a phenh tawn i a thlapale a cawl len khi ka hmuh. Sawngkhawi phun ah pakhat pakhat senh sehlaw a dawh khi ka hmuh. Cun nu ka hmuh khawh ti lo caah ka thinphang, ka lunghring tuk cang.

Innpi mei a hung mit i caan sau ngai thawngpang a hung dai. Inn leng a hung chuak, i hnawmhlonhnak palastik nak lianpi in thiltom lianpi cu a liang ah a hun bah i hlei cun a ttum. A mawttaw hnulei kuang a on i thiltom cu rethei ngai in a senh, aa harh ngai. Cu hnu ah innte lei ah a va kal, a mawttaw a khar lo. Innte cu mei hmit lo in bleca aa lak lio ka hmuh caah ka lunghrinh tuk cang i inntang ah ka ttum zazawk. Ka chungle an um lo. Phone ka lak zawk i Palek zung ka chawnh. Thilsining ka chimh hna. Palek nu nih phone in a ka chimhmi bia nih a ka lauter, “Mithatpa cu tuzanlei suimilam 5 ah palek nih an kah i atu hi a ruak an zoh lio a si,” a ka ti. Nain ka duh ve lo i, nan i palh ko lai, ka ti ve hna. Cun ka hmuhmi cu ka chimh chih hna ruang ah, “Kan hung phan zau lai,” a ka ti.

Inn cung ka room ah cun ka va kai tthan i a mawttaw hnulei a khar rih lomi cu ka hmuh. A inn cung mei a ceu tthan i inn cung ah a kai tthan ti a fiang. Cucaah a rannak in ka ttum i a dum chung mawttaw kam ah ka va kal. Palek nih mithatpa kan kah, an ti mi nih ka lung a tuai. Kan innpa pa hi mithat a si ko tiah ka puh peng rih ko. A thil tom kha zeidah a si hnga, mithat a si lo cun,… tiah ka lung a tur in tur…

Rang nawn in ka kar ka hlaan i a innhmai ka phan. Innka on thawng ka theih caah ka dir, ka thlen hripi nih a ka kholh, ka rat kai chir. ”Hei, Zeidah na tuah, nai hngilh kho lo maw?” tiah hawikom i chawnh tawn ning in a ka chawnh i a aw nem ngai. Ka thin phan tuk caah, ”aw, zeidah na ti lai?” tiah ka hal. A inn hnawm a tam tuk cang i hlonh aa timh kong a ka chimh. Cu bia ka theih cu, ka ttih, ka lunghring chinchin,.. Tu zanlei an lengmi nu kha ai dawh ngai, ka ti. A holh lo, hnu lei a ka chit i ”na lawi ah a ttha lai,” a ka ti. Ka naih deuh i hnawm hlonh cu kan bawm lai, ka ti. A mawttaw kutka aa tlai pah cun, a von i her i lawi cang, a ka ti cuahmah lio ah cun Palek cu an hung phan.

Ka thin phang. Palek pathum cu an hung ra. Kan innpa pa nih cun a ka zoh, a mithmai ka zoh ngam lo. Palek nih a mawttaw zoh piak an timh i a duh lo. Palek nih an ka hal, a hnu kuang ah nu pakhat a thahmi a chiah ko, ka ti ve. A thin hang tuk i a ka met. Cun,.. a hun ka nam i ka hngawng in a ka dik le a mawttaw ah a von ka bek.. Palek pahnih nih an dawh i an tlaihrek ve. Palek pakhat nih a mawttaw tawh cu a hun on i thiltompi cu har ngai in a hun chuah.. “Zeidah a si?” tiah a hal. “Hnawm!” tiah a leh hna. Kei nih ka duh ve lo, nu pakhat he an hung lawi i an i sii, cun nu a lawi ka hmu ti lo, tiah thil sining ka chimh hna. A thah i a ruak a tommi si ko lai.

Palek pa nih cun a innhmai mei a von on. Thiltom cu a von phoih cuahmah. Ka thin tur. Ka thinphang. Thiltom cu a von on i meiceu tang ah hnawmhne lawngte an rak si tak ko.

--------------------
Note: "december ka phan tthan cang" timi lenhloi tawi khomhsuat 2010 chuak chung in cauk a hmu lo hawikom caah ka van tarmi a si.

Comments

  1. a dih tiang rel lo awk thalo bak in na tial....

    ReplyDelete
  2. a dih tiang rel lo awk thalo bak in na tial....

    ReplyDelete

Post a Comment